بقلم الشيماء مسعد

استقام رازي يطالع المكتبة شاهقة الارتفاع ولم يطرح سوى سؤال واحد : ايه اللي خلاكي تحكيلي دلوقتي كان ممكن تفضلي محتفظة بسرك انتي والياس .

قال اسم أخيه بتهكم فهو لا يصدق ان أخاه قد كذب عليه اخر شئ كان يتوقعه هذا .
أجابت بكل صدق وبراءة : أنا الصبح دخلت المكتب هنا بس والله مش عشان اراقبك ولا اتجسس عليك كان بس عندي فضول اعرف الحادثة اللي انت عملتها ، حصلت ازاي ، فجأة فتحت دفتر لقيته على المكتب قرأت فيه جملة ارعبتني
ابتسم بتهكم وقال : يقولون ان حبل الكذب قصير وانا اقول انه مهما كان قصيرا سأجعله يلتف حول رقبتك ليشنقك إن كذبت عليا يوما .
هزت رأسها بنعم وقالت : ايوا هي الجملة دي ، حسيت اني لازم احكيلك حكايتي بس دا ما يمنعش اني هافضل برضو الممرضة لحضرتك .
زفر بنزق وقد كان حقا مصدوم من تصرف أخيه. أشار إليها بيده اي اذهبي
تحركت مسرعة للخارج وهي تلتقط أنفاسها بصعوبة أثر الخوف الضغط الذي تعرضت له وهي تقص عليه تفاصيل حياتها ..كانت تضع يدها على قلبها في محاولة منها لتنظيم أنفاسها المتسارعة
_______________________

كان عصفور ماثلا أمام ممدوح الصاوي في مكتبه
أشار له ممدوح بالجلوس ، جلس عصفور على مضض
_مليون جنيه ؟
كان هذا ما تفوه به ممدوح
عقد عصفور حاجبيه وقال : مش فاهم ؟
اكمل ممدوح : مقابل انك تدلني على مكان قدر
تنهد عصفور بملل وقال : يا ممدوح باشا ، انا اللي عندي قلته والله ما اعرف قدر فين دلوقتي ولو انت قلقان عليها قيراط انا قلقان ٢٤ .
رمقه ممدوح بنظرات واثقة وهو يقول : متأكد انك متورط في هروب قدر ولو بس اتأكدت انك كان ليك يد في الموضوع أو حتى خطيبتك ليها يد مش هرحمك هضربك في أكتر حاجة بتوجع .

حافظ عصفور على ثباته النفسي قدر المستطاع لقد اربكه كلامه حقا استقام واقفا وهو يقول : لو لقيت قدر ما تنساش تطمني عليها يا ممدوح بيه

شعر بالإهانة والتهكم في نبرته فقال ما يدب الخوف في اوصاله : هتفضل بالنسبة لي موضع شك لحد ما اتأكد انك فعلا كان ليك يد وساعتها بقى ابقى اطمن على نفسك وعلى… عزة

اشاح بوجهه وتوجه ناحية الباب وما ان خرج حتى اخرج منديلا يجفف به عرقه فقد تعرق كما لو كان يركد تحت شمس أغسطس الحارقة ..

تنهد طويلا ورحل وهو لا يفكر سوى في قدر هل هي بخير هل استطاعت ان تدبر أمور حياتها ، هوى قلبه أرضا حينما خطر له هل أصابها مكروه هل تعرضت لخطر يا إلهي لديها رقم هاتفي لكنها لم تتصل لا أعرف ما حل بها لكن اتمنى ان تكون تلك الصغيرة البريئة بخير ،اتمني لو يدعها العالم القاسي ان تمارس برأتها دون أن يدنس الشر ثوب تلك الفتاة الأبيض الناصع