رواية حبيبتي مجرمه بقلم نيمو محمد
رواية حبيبتي مجرمة تحت التحقيق 😂❤️🔥
بقلم نيمو محمد
الجزء الأول
“ارفع إيدك يا حضرة الظابط بدل ما أضطر أقبض عليك!”
الصمت نزل على المكان كله
العساكر بصوا لبعض وأمين الشرطة فتح بقه لدرجة إن اللبانة وقعت منه أما الظابط آدم الدمنهوري ففضل باصص للبنت اللي واقفة قدامه ماسكة مسدس بإيد وكيس كشري بالإيد التانية
آدم بص للمسدس وبعدين للكشري وبعدين لها وقال ببرود
إنتي عارفة إنك محاصرة من عشرين عسكري
البنت حشرت معلقة كشري في بقها وردت بمنتهى الهدوء
آه وعارفة إنكم عشرين واحد ومفيش فيكم واحد فكر يجيب عيش بلدي مع الكشري
أمين الشرطة حط إيده على وشه وقال
يا نهار أسود يا فندم دي شكلها مش مجرمة دي شكلها مصيبة سودا
آدم قرب منها بخطوات ثابتة وعينه ما فارقتش عينيها
اسمك إيه
نرمين
اسمك بالكامل
نرمين عبدالسلام
سنك كام
وإنت مالك هتجوزني
العساكر انفجروا في الضحك وآدم لف لهم ببطء فالضحك مات في زورهم في ثانية
رجع بص لها وقال
واضح إنك مش فاهمة إنتي واقفة قدام مين
نرمين هزت راسها وهي بتاكل
فاهمة طبعًا حضرتك الظابط آدم الدمنهوري اللي صورته مالية القسم واللي عامل فيها سي السيد على خلق الله
آدم رفع حاجبه
وإنتي بقى مين يا ست هانم
ابتسمت ابتسامة مستفزة وقالت
أنا اللي هخليك تقدم استقالتك
نعم
أصل شكلك طيب وأنا مش بحب أقطع عيش حد
آدم خطف كيس الكشري من إيدها وحطه على المكتب
خدوها على الحجز
نرمين شهقت
إنت بتعمل إيه يا بني آدم
بني آدم أيوه والحمد لله لسه ما اتحولتش لحيوان بسببك
طب رجعلي الكشري الأول يا أخويا ده أنا دافعة فيه فلوس
آدم أشار للعسكري
خد الكشري حطه في التلاجة لحد ما نخلص التحقيق
نرمين بصت له بصدمة
إنتوا كمان بتصادروا الأكل ده أنا طلعت مجرمة في دولة تانية خالص
قبلها بثلاث ساعات كانت نرمين قاعدة في عربيتها القديمة اللي صوتها عامل زي جرار زراعي وبتكلم صاحبتها في التليفون
يا بت أنا بقولك فيه حد مراقبني من الصبح
صاحبتها ردت وهي بتاكل
يمكن معجب
معجب إيه يا بنتي ده راجل لابس كمامة ونضارة سودا وماشي ورايا من أول الشارع
يمكن عنده برد
يا شيخة اتنيلي هو البرد بيخليه يركب ورايا على موتوسيكل
قفلت نرمين المكالمة وبصت في المراية لقت الموتوسيكل واقف وراها فعلًا
دارت العربية بسرعة لكن العربية قررت تختار التوقيت ده بالذات عشان تعلن إضرابها عن العمل
