بقلم الشيماء مسعد 3

كانت نبرتها كافية لتقطع انياط قلبه حزنا على حالتها تلك ، الهذا الدرجة جعلوها اولئك عديمي الرحمة تخشى ان تعود إليهم مرة أخرى ..

عاد مرة أخرى وربت على يدها وقال : لحظات وهارجعلك
هزت رأسها بالرفض وقالت : ارجوك ،لا

تنهد وجلس جوارها على الفراش وقال ممازحا : طلع قلبك خفيف اوي ، دانا قلت مخربشة وهتخربها لو حد اتعرض لها

ردت بحزن دفين نابع من سنوات عذاب : إنت ماجربتش تعيش طفولتك كلها بين رجالة غريبة كل واحد يلمسك بطريقة مش بريئة حتي السلام بتاعهم ماكانش برئ ، ما جربتش تجاهد كل يوم عشان تفضل عايش بشرفك ، أنا كنت بنام نص نومة عمري ماتعمقت في النوم ، كنت اصحي على ممدوح قاعد جنبي على السرير ، لحد ما حوشت فلوس واشتريت قفل ومفتاح وبقيت بقفل على نفسي من جوا ..

كانت كل كلمة تخرج ومعها سيل من الدموع ، حتى هو لم يستطع ان ينصت للنهاية كل كلمة كانت بمثابة حريق يشب داخله تمنى لو يفتك بهم جميعا ، لو يقسم ممدوح نصفين

وضع يده على فمها بإشارة منه بألا تسترسل وقال بحنو : ننسى الماضي خلاص ، مافيش فيه الا وجع القلب ، إنتي كنتي شجاعة بجد انهاردة عشان قدرتي تفلتي منهم انتي قوية ياقدر ، لو ضعيفة كنتي استسلمتي وروحتي معاهم من غير مقاومة لكن انتي بجد قوية .

ابتسمت أثر سماعها هذا الكلام الذي حمسها وبث فيها روح الشجاعة
نظرت له وكأنها تذكرت شئ ما وقالت : ايدك انت حركتها ، أنا شوفتك ،وريني ايدك ..
خرجت كلماتها مبعثرة غير مرتبة
رفع كتفيه وقال : معجزة !
رفع يده يحركها أمام عينيه يمينا ويسارا ليتأكد أنها ما زالت تتحرك
بدت السعادة على وجهها تجرأت لتمسك يده تلك وقالت : الحمد لله هي بخير دلوقتي، أنا مبسوطة قوي عشانك

حثها قائلا : قومي خدي دش دافي وغيري هدومك كلها تراب وعفر .
ردت بحزن : وقعت كذا مرة وانا بجري .
استقام واقفا وقال : وقعتي بس في النهاية نجحتي وقدرتي تهربي
ردت هي بامتنان حقيقي وقالت : إنت انقذتني
حك خلف رأسه بحرج وقال بمشاكسة : طب عدي الجمايل بقى
ضحكت هي ومطت شفتيها بتكشيرة مصطنعة وقالت : مغرور
سمع همسها وقال وهو يرتب ياقة سترته : عارف
ضحكت وهي وتابع هو : هانزل شوية لحد ما تخلصي الدش بتاعك .
هزت رأسها بالموافقة

هبط لأسفل توجه إلى المطبخ اعد لها مشروب الأعشاب ، أخرج هاتف الرجل الذي اوقعه أثناء الشجار من جيب جاكته والذي ما إن أخرجه حتى وقعت بطاقة هوية قدر التقطها من الأرض نظر إليها
وقال بحزن : عندها عشرين سنة صغيرة اوي على اللي كان بيحصل معاها ..