بقلم سلمي محمد
ضحكت بيسان على رده:
-طيب ياحضرة الدنجوان بالنسبة لنظرة حضرتك الخبرة، ممكن تجاوبني على سؤالي هو منظره دلوقتي بيقولك إيه؟
تصنع كريم نظرة التفكير العميقة :
-بالنسبة لنظرة خبير زي متمرس في أمور الحب اقدر اتكلم واقولك.
نغزته بيسان بحدة في صدره قائلة بغيظ :
-هات من الاخر يا بارد.
كريم بزعل مصطنع:
-اااه ياقلبي، القلب اللي كله حيوية وحب يتقال عليه بارد.
كلامه أثار سخطها:
-هات من الاخر بيحبني ولا لأ.
الهزل اختفى ليتكلم بجدية:
– بيحبك.
_بجد ياكريم بيحبني.
_ايوه بجد وانا متأكد من كلامي هندرد برسنت.
تمتمت بيسان بحزن:
-بس هو قالي زمان إنه بيحبني زي أخته وعمره ماهيفكر فيا كحبيبه وهو اصلا السبب في سفري واني اكمل دراستي برا.
تكلم كريم بحب:
-كل ده عارفة انتي قولتيه ليا، بصراحة يابسبوسة انا مش جيت مخصوص عن الصفقة الجديدة كان ممكن اي حد غيري يجي مكاني.
سألت بيسان :
-أمال جيت ليه؟
نظر لها بحنو:
– عشانك إنتي يا بيسان، عشان طول السنين اللي كنتي عايشة فيهم معانا نظرة الحزن مكنتش بتفارق وشك، فأنا قررت أشوف البني أدم السبب المسئول عن حزنك، عشان اخلص عليه وانتقم منه.
قالت بذعر:
– لا مش عايزاك تخلص عليه.
نظر لها بابتسامة ماكرة :
-مادام مش عايزني أخلص عليه، يبقا تخليني افكر إزاي أخليه يعترف بحبه ليكي.
تمتمت بيسان :
-أنت بتقول أيه ياكريم.
رد كريم:
– اللي سمعته، بس انتي تسمعي كلامي في إللي هقوله ليكي، هخليه يطلب منك العفو والسماح على اللي عمله معاكي زمان، وانتي بقا وقتها تعملي إللي تحبيه.
قالت بعدم تصديق :
-بجد ممكن زاهر يقولي بحبك، ممكن يقولي عايز اتجوزك.
رد كريم بثقة:
-متأكد أوي، إنتي إزاي مأخدتيش بالك من نظراته ليكي، سهل أوي تخليه يرفع الرايا البيضا ويعترف ليكي، زمان كنتي صغيرة دلوقتي لا وتقدري تخليه يقولك تتجوزيني مش يقولك بحبك، بس إنتي اسمعي كلامي.
قطبت بين حاجبيها بتركيز عميق ثم قالت:
-وانا معاك في اي حاجة، خلينا ورا الفشار لحد باب الدار.
كريم بابتسامة :
-ألفاظ بيئة بيئة.
*****
انتظرت زهرة ميعاد انصرافهم وتحدثت مع بسام بخصوص نسبتها.
قالت زهرة بإصرار:
-نسبة الاتنين في الميه قليل اوي،أنا عايزه خمسة في الميه، بصراحة كلامك معايا جاه في وقته وبعد ما فكرت كويس لقيت المثل والمبادئ مش بتأكل عيش ولا هضمن اجيب بيهم علاج أمي.
