الدكتور المغرور بقلم نيمو محمد
نسخ
🔥 الدكتور المغرور وقع في حب الدكتورة المشاغبة 🔥
✍️ بقلم نيمو محمد
“الدكتور الجديد ده شايف نفسه أوي يا بنتي، ده داخل المستشفى كأنه مالكها!”
قالها الدكتور يوسف وهو قاعد جنب الدكتورة ملك في اجتماع الأطباء، فملك كتمت ضحكتها وقالتله بصوت واطي:
“طب ما تسكت يا يوسف، الراجل لسه جديد وهنشوف أخرتها معاه إيه!”
لكن اللي ملك ماخدتش بالها منه إن الدكتور سليم النجار، مدير القسم الجديد، كان واقف قدامهم وسمع كل كلمة.
بصلهم بنظرة باردة وقال بصوت حاسم:
“واضح إن في ناس عندها وقت للكلام أكتر من الشغل! الاجتماع انتهى، وكل واحد يرجع مكانه.”
الكل قام من مكانه بسرعة، ويوسف مال على ملك وهمس:
“شوفتِ؟ أهو ده اللي كنت بقولك عليه، مغرور رسمي!”
ملك كتمت ضحكتها بالعافية وخرجت من القاعة، من غير ما تعرف إن اللحظة دي كانت بداية حكاية هتقلب حياتها كلها.
من اليوم ده، سليم بقى واقف لها على الواحدة.
“دكتورة ملك، التقرير ده ناقص.”
“دكتورة ملك، اتأخرتي خمس دقايق عن المرور.”
“دكتورة ملك، عايز أشوف نتيجة التحاليل قبل نهاية اليوم.”
ملك كانت بتتحرق من جواها، وكل ما تشوفه تقول لنفسها إنها لازم ترد له الكلمتين دول في يوم من الأيام.
لكن الغريب إن سليم، رغم شدته معاها، كان دايمًا عينه عليها، بيتابعها وهي بتشتغل، وبيلاحظ كل حركة بتعملها، حتى ضحكتها اللي كانت بتخليه يفقد تركيزه من غير ما يحس.
وفي يوم، كانت ملك قاعدة في كافتيريا المستشفى مع يوسف، وبيحكيلها موقف مضحك حصل له مع أحد المرضى، فضحكت من قلبها.
وفجأة، صوت جه من وراهم:
“دكتور يوسف!”
يوسف اتعدل في قعدته أول ما شاف سليم واقف قدامه.
“أيوه يا دكتور؟”
سليم بص له بجمود وقال:
“إنت هتستلم النبطشية الليلية النهارده بدل دكتور كريم.”
يوسف فتح عينيه بصدمة:
“بس يا دكتور، أنا مخلص نبطشية امبارح بالعافية!”
سليم رد ببرود:
“ده قرار إداري، تقدر تناقشه مع الإدارة.”
ومشي من غير ما يبص له تاني.
ملك بصت ليوسف وقالت باستغراب:
“هو إيه اللي حصل فجأة؟”
يوسف ضيق عينيه وبص ناحية سليم وهو ماشي:
“أنا بدأت أشك إن المدير المحترم ده مش طايقني أنا بالذات!”
ملك حاولت تضحك، لكنها كانت فاهمة إن الموضوع مش مجرد شغل، وإن نظرات سليم ليها بقت مختلفة، خصوصًا كل ما يشوفها بتتكلم مع يوسف.
