رجعت بيتي حكايات نيمو محمد
وبالفعل بدأت أجمع كل حاجة وأحتفظ بنسخ منها
بعدها بساعتين جرس الباب رن
فتحت لقيت أختي منى واقفة قدامي ووشها متوتر
دخلت بسرعة وقفلت الباب وراها وبصتلي وقالت
سارة إنتي عملتي إيه
بصتلها باستغراب
عملت إيه يعني
قالت وهي بتقعد على الكنبة
ماما بتقول إنك بلغتي عنها وإن في مشكلة كبيرة حصلت في الميناء وإنها اتسألت من الشرطة
رديت بهدوء
أنا بلغت عن استخدام بطاقتي من غير إذني وعن اللي حصل لابني وإنتي عارفة كويس إنها سابته لوحده
منى هزت راسها وقالت
بس هي بتقول إن آدم كان مع واحدة جارتكم وإنها كانت مطمنة عليه
حسيت إن الغضب رجع يشتعل جوايا
كذابة يا منى مفيش حد كان معاه ولو كانت مطمنة عليه كانت قالتلي اسم الشخص ده من الأول
منى سكتت شوية وبعدها قالت جملة خلتني أبصلها بصدمة
سارة أنا مش جاية أدافع عن ماما أنا جاية أقولك إنك لازم تعرفي الحقيقة قبل ما تواجهيها
قلبي بدأ يدق بسرعة
حقيقة إيه
منى بصت ناحية باب الشقة وكأنها خايفة حد يسمعها وبعدها قربت مني وقالت
الراجل اللي في الصورة اللي جوه الظرف ده مش غريب عنك زي ما إنتي فاكرة
طلعت الصورة من الظرف وحطيتها قدامها
إنتي تعرفيه
منى أول ما شافت الصورة عينيها اتمليت بالدموع
ده أبوكي يا سارة
اتجمدت مكاني
أبويا مات وأنا عندي خمس سنين وكنت فاكرة إن الصور اللي عندي ليه قليلة لأن ماما كانت بتكره تتكلم عنه
لكن الراجل اللي في الصورة كان مختلف عن الصور اللي شفتها قبل كده
بصيت لمنى وقلت
إنتي بتقولي إيه أبويا كان اسمه محمود وده مش هو
منى مسحت دموعها وقالت
محمود كان جوز ماما قدام الناس لكن الحقيقة إن في حكاية تانية محدش في العيلة كان يعرفها غير ماما وجدتي وأنا عرفت جزء منها بالصدفة من سنين
حسيت إن الدنيا بتلف بيا
يعني إيه جوزها قدام الناس
منى طلعت ورقة صغيرة من شنطتها وادتهالي
الورقة دي كانت مع ماما من زمان وأنا صورتها قبل كده علشان كنت شاكه إن في حاجة غلط
فتحت الورقة ولقيت اسم محامي قديم وعنوان مكتب في وسط البلد وتاريخ راجع لأكتر من عشرين سنة
وتحت الاسم كانت مكتوبة جملة واحدة
إقرار استلام أمانة تخص الطفلة سارة
رفعت عيني لمنى وأنا مش قادرة أتكلم
إيه الأمانة دي
منى ردت بصوت مهزوز
معرفش بس أنا سمعت ماما مرة بتقول لجدتي إن الفلوس اللي اتسابِت ليكي لو ظهرت دلوقتي هتضيع كل اللي عملته
