الدكتور المغرور بقلم نيمو محمد
في اللحظة دي، دخل الدكتور مازن المكتب، وكان واضح إنه سمع آخر الكلام.
قال بعصبية:
“الكلام ده كدب! أنا معملتش حاجة!”
لكن الأدلة كانت واضحة، والإدارة قررت فتح تحقيق رسمي معاه ومع شريف، واتخذت الإجراءات اللازمة وفقًا لنتائج التحقيق.
وبعد ما اتأكدت براءة ملك من الاتهامات، اتلغى قرار إيقافها عن العمل، واعتذرت لها الإدارة عن الضرر اللي اتعرضت له.
ملك خرجت من الاجتماع وهي حاسة إن جبل كان على قلبها واتشال.
يوسف جري ناحيتها وقال بفرحة:
“مبروك يا دكتورة! كنت عارف إن حقك هيرجع!”
ملك ضحكت وقالت:
“الحمد لله، بس إنت كمان كنت سند ليا في وقت صعب.”
يوسف بص ناحية سليم اللي كان واقف بعيد، وابتسم بخبث وقال:
“أنا عملت اللي عليا، والباقي بقى على الدكتور المغرور!”
ملك بصتله باستغراب:
“قصدك إيه؟”
يوسف ضحك وقال:
“ولا حاجة يا ستي، أنا عندي شغل مهم جدًا بره!”
وسابها ومشي، وهو بيضحك على نفسه لأنه كان فاهم من أول يوم إن سليم بيغير عليه منها.
بعد انتهاء الشيفت، ملك كانت خارجة من المستشفى، لقت سليم مستنيها عند البوابة.
قالت وهي بتبتسم:
“خير يا دكتور؟ في تقرير ناقص تاني؟”
سليم ضحك وقال:
“لا، المرة دي عندي طلب شخصي.”
ملك رفعت حاجبها وقالت:
“طلب شخصي؟ هو إحنا مش في المستشفى يا دكتور؟”
رد وهو بيبصلها:
“أنا عارف، وعشان كده مستنيكي بره الشغل، علشان أقدر أتكلم معاكي من غير ما أكون مديرك.”
ملك ابتسمت وقالت:
“اتفضل يا سيدي، سامعاك.”
سليم وقف قدامها وقال بجدية:
“أنا عارف إني كنت قاسي معاكي، وإن غيرتي كانت بتخليني أتصرف بطريقة غلط، وده مش مبرر. أنا آسف يا ملك.”
ملك بصتله بهدوء وقالت:
“أنا مش بحب الراجل اللي يفتكر إن الغيرة معناها إنه يتحكم في اللي قدامه، ولا اللي يعاقب الناس لمجرد إنه متضايق.”
سليم هز راسه وقال:
“عندك حق، وأنا مش بطلب منك تنسي اللي حصل في يوم وليلة. أنا بس بطلب فرصة أثبتلك إني أقدر أكون أحسن من كده.”
ملك فضلت ساكتة شوية، وبعدها ابتسمت وقالت:
“بصراحة يا دكتور، إنت رخم ومغرور ودمك تقيل…”
سليم حط إيده على قلبه بتمثيل وقال:
“كل ده مرة واحدة؟ طب استني لما تسمعي باقي المميزات!”
ملك ضحكت من قلبها، وقالت:
“بس رغم كل ده، أنا كمان بقيت بحبك.”
سليم بص لها بفرحة مش قادر يخبيها وقال:
“ممكن تعيدي الجملة دي؟ أصل أنا محتاج أتأكد إن وداني لسه شغالة!”
