ممكن تحبيني
ممنوع تحبيني
رهف كانت دكتورة قلب مشهورة في المستشفى بتاعها انها التلاجة. مش تلاجة بمعنى الكلمة بس تلاجة في معاملتها. وشها على طول مكشر وجامد وما بتضحكش لحد. ولو حد حاول يهزر معاها هزار بايخ بتديه كلمتين يخلوه يلف حوالين نفسه. كانت شاطرة جدا بشهادة الكل. اصغر دكتورة قلب تاخد منصب استشارية في المستشفى الكبير ده. وكانت بتحب شغلها لدرجة الجنون. بتيجي من ستة الصبح وما بتروحش غير لما اخر مريض يمشي. لابسة البالطو الابيض بتاعها زي الدرع. درع بيحميها من الناس ومن الدنيا كلها.
يمنى صاحبتها الانتيم من ايام الجامعة كانت دايما تقولها يا بنتي فكيها شوية انتي قلبك هيوقف من كتر ما انتي قافلة عليه. ورهف ترد تقولها قلبي ده للشغل وبس يا يمنى انا مش فاضية للكلام الفاضي ده. دينا بقى كانت الممرضة اللي معاها في القسم وكانت بتحبها جدا وبتخاف منها في نفس الوقت. كانت عارفة ان رهف طيبة من جوا بس عاملة سور عالي حوالين نفسها.
في يوم عادي جدا من ايام الشتا البرد دخل المستشفى حالة طوارئ. شاب عامل حادثة بالموتوسيكل بتاعه. داخل يضحك ويهزر والممرضين شايلينه. كان اسمه زياد. عنده سبعة وعشرين سنة. شكله ابن ناس ومهندم حتى وهو عامل حادثة. هدومه مقطعة وفيه جرح في دماغه ودراعه متعور جامد بس هو ولا كأنه هنا. عمال يبص على الممرضات ويقولهم ايه القمر ده كله في مكان واحد.
دخلوه على قسم القلب لان ضربات قلبه كانت مش منتظمة بعد الحادثة. وهنا كانت الصدمة الاولى لرهف. اول ما شافته اتعصبت. قالت بصوت عالي ايه الاستهتار ده موتوسيكل وبتجروا بيه زي المجانين وعايزين ايه في الاخر تموتوا وتتعبونا معاكم. زياد بص لها من فوق لتحت وضحك. قال الله اول مرة اشوف تلاجة بتتكلم. انتي الدكتورة ولا ايه. لا بجد قمر وانتي متعصبة كده.
رهف اتصدمت. ما حدش عمره كلمها كده في المستشفى. كل الناس بتعملها الف حساب. راحت قايلة له بكل برود اتفضل اقعد على السرير واخرس خالص لحد ما اخلص كشفي. انا هنا الدكتورة وانا اللي اقول ايه اللي يتعمل. زياد قالها حاضر يا دكتورة. بس على فكرة انا اسمي زياد مش اخرس. ولو عايزة تعرفي اسمي بالكامل ممكن نتقابل برا المستشفى في مكان احلى.
كشفت عليه وهي بتحاول ما تبصلوش. بس هو كان مصر يبص لها ويستفزها. كل ما تحط السماعة على قلبه يقولها ها سامعة ايه. سامعة قلبي بيقول رهف رهف. وهي تقول له لو ما سكتش هطلب لك امن المستشفى يرميك برا وانت متكسر كده. زياد ضحك وقال يا ساتر كل ده عشان بقولك انك حلوة. اومال لو قلتلك بحبك هتعملي ايه هتموتيني.
