داليا

داليا كانت في تالتة ثانوي لما أول مرة قلبها دق بجد، مكنش زي أي حب عيال صغيرة بيروح وييجي، كان حب بيخليها تصحى بدري مخصوص عشان تشوفه وهو معدي من تحت البلكونة رايح المدرسة، مؤمن، الواد الطويل أبو ضحكة مكسوفة وشعر منكوش دايما، اللي ساكن في نفس الشارع من وهما عيال صغيرة بيحدفوا بعض بالطوب ويلعبوا استغماية. كبروا سوا، كل الناس في الحتة كانت عارفة ان داليا بتاعت مؤمن ومؤمن بتاع داليا، حتى المدرسين في المدرسة كانوا بيضحكوا لما يشوفوهم واقفين بعيد يتكلموا خمس دقايق قبل الطابور، كانت أيام جميلة أوي، أيام الدروس اللي بيروحوا ياخدوها سوا عند سناء، سناء دي كانت صاحبة داليا الانتيم، البنت الجدعة اللي بميت راجل، هي اللي كانت بتغطي عليهم وتقول لمامتها ان داليا عندها بتذاكر وهي في الحقيقة نازلة تقابل مؤمن على ناصية الشارع. وشذى كمان كانت معاهم، شذى البنت الرقيقة اللي صوتها واطي وبتتكسف من خيالها، كانت دايما تقول لداليا خلي بالك يا داليا مؤمن بيحبك أوي بس دماغه ناشفة وكبرياءه سابق سنه، داليا كانت بتضحك وتقول يا بت ده بيغير من الهوا الطاير عليا، ده لو طال يحبسني في البيت هيحبسني. مؤمن كان بيحبها حب مجنون، بيحبها لدرجة تخنق، كل ولد يبص لداليا كان بيعتبره عدو شخصي، وكان شايلها في عينيه، نفسه يدخل هندسة عشان يبقى مهندس قد الدنيا ويجيب لها الشقة اللي بتحلم بيها، وداليا كانت بتحلم معاه، كانت شايفة مستقبلها كله في عينيه، لحد ما جيه اليوم المشؤوم ده. كان يوم عادي جدا، كان عندهم درس فيزياء عند الاستاذ ساهر، ساهر ده كان شاب صغير لسه متخرج وبيشرح حلو أوي وكل البنات بتحب حصته عشان دمه خفيف، داليا كانت قاعدة بتضحك بصوت عالي مع لؤي، لؤي ده كان زميلهم في الدرس، واد روش وبيقول نكت وبيهزر طول الوقت، وهي كانت بتضحك من قلبها عشان النكتة كانت فعلا تضحك، ضحكة بريئة مفيهاش أي حاجة، بس مؤمن دخل في اللحظة دي، شافها، شاف ضحكتها اللي هي ملكه هو وبس رايحة لواحد تاني، شاف ازاي لؤي قريب منها وازاي هي مبسوطة، الدم غلي في عروقه، كبرياءه اللي شذى كانت بتتكلم عنه نط في وشه. مرضيش يتكلم قدام الناس، استناها بره الدرس، أول ما خرجت ووشها منور بالضحك، قالها بكل برود الدنيا انتي بتعملي ايه جوه، قالتله ايه بعمل ايه يعني كنا بنهزر عادي، قالها بتهزري مع ده بصوت عالي كده ليه، هو انتي مفيش حد مالى عينك، داليا اتصدمت من طريقته، قالتله انت بتقول ايه يا مؤمن انت اتجننت، ده زميلنا عادي يعني، قالها لا مش عادي، انا شوفت بعيني، وانا اللي كنت فاكرك غير كل البنات، انتي طلعتي رخيصة. كلمة رخيصة دي نزلت على قلب داليا زي السكينة، عمرها ما نسيتها، عمرها ما قدرت تنساها، عيطت في الشارع، قالتله انا رخيصة يا مؤمن، ماشي يا مؤمن شكرا، ومن ساعتها وهي ما كلمتوش تاني، وهو استنى انها هي اللي ترجع وتعتذر، هي استنت ان هو اللي يرجع ويصالحها، والكبرياء دخل بينهم زي حيطة سد، لا هي كلمته ولا هو كلمها، خلصت الثانوية العامة وداليا دخلت تجارة ومؤمن دخل هندسة في محافظة تانية، وكل واحد راح في طريق، وانقطعت كل الاخبار. عدت عشر سنين، عشر سنين كاملة، كأنهم عشرين، داليا اتجوزت جوازة صالونات من واحد قريب مامتها، واحد غني ومتيسر بس قلبه قاسي، خلفت منه ولد زي القمر سمته آدم، بس الجوازة ما استمرتش، الراجل كان بيهينها وبيضربها وبيشك فيها طول الوقت، فطلبت الطلاق بعد تلات سنين عذاب، ورجعت بيت أهلها معاها آدم اللي عنده دلوقتي أربع سنين، بقت مطلقة ومعاها طفل، الناس بتبص لها نظرة مش حلوة، بس هي كانت قوية، اشتغلت في شركة محاسبة صغيرة وكانت بتربي ابنها لوحدها، وكانت دايما بتقول لسناء انا مش هسمح لراجل يهين كرامتي تاني أبدا حتى لو هموت من الوحدة. وسناء اتجوزت وسافرت السعودية مع جوزها، وشذى اتخطبت لظابط، أما مؤمن فبقى مهندس كبير، فتح مكتب مقاولات لوحده، بس عمره ما حب بعد داليا، كل واحدة كان بيشوفها كان بيقارنها بيها، ويفضل يقول لنفسه لا مفيش زي داليا، وفضل شايل صورتها القديمة في محفظته، الصورة اللي كانت واخدها ليها في رحلة المدرسة وهي بتضحك. وفي يوم خميس، كانت داليا واخدة آدم ورايحة لدكتورة الاطفال عشان كان سخن، كانت مستعجلة وبتجري في مول كبير في القاهرة، فجأة ابنها شد ايدها وطلع يجري، وهي بتجري وراه وبتقول يا آدم استنى يا حبيبي، فخبطت في واحد جامد والشنطة وقعت منها، وطت تجيب الشنطة وهو بيوطي معاها، رفعوا وشهم في نفس اللحظة، الدنيا لفت بيهم، مؤمن، داليا، بعد عشر سنين، نفس العيون، نفس النظرة، بس وشوشهم اتغيرت، بقى فيه تجاعيد خفيفة من الهم. مؤمن فضل متنح ثواني مش مصدق، قال داليا، قالتله مؤمن، صوتهم كان بيترعش، آدم رجع ومسك في رجل مامته وقال ماما، مؤمن بص للولد الصغير وقال ده ابنك، داليا هزت راسها وقالت آه آدم ابني عنده أربع سنين، مؤمن حس بسكينة تانية دخلت قلبه، قالها انتي اتجوزتي، قالتله واتطلقت، سكتوا الاتنين، المول دوشة حواليهم والناس رايحة جاية وهم واقفين في دنيا تانية لوحدهم. أخدوا بعض وقعدوا في كافيه في المول، مؤمن طلب قهوة وداليا طلبت عصير لآدم، وبدأوا يتكلموا، كلام متقطع في الاول، عاملة ايه، انت عامل ايه، اخبارك ايه، وبعدين الكلام فتح، داليا حكت له عن جوازتها اللي فشلت وعن الوجع اللي شافته، وعن ازاي بقت قوية غصب عنها، ومؤمن حكى لها عن غربته وعن شغله وعن ازاي عمره ما نسيها، وقالها انا لسه بحبك يا داليا، من يوم ما سيبتك وانا بحبك، انا عارف اني كنت غبي وحمار وكبريائي هو اللي ضيعك من ايدي. داليا عيطت، بس المرادي دموعها كانت ناشفة، قالتله سهل أوي تقول كده دلوقتي يا مؤمن بعد عشر سنين، سهل أوي تقول لسه بحبك بعد ما وجعتني وقلت عليا رخيصة، انت عارف كلمة رخيصة دي عملت فيا ايه، انا فضلت سنين أسأل نفسي هو انا رخيصة فعلا، انت كسرتني قبل ما جوزي يكسرني، انت اللي علمت الرجالة ازاي تهينني. مؤمن قالها حقك عليا، انا كنت عيل صغير وغبي وغيرتي عمتني، اديني فرصة أصلح كل ده، انا هربي آدم كأنه ابني، وهعوضك عن كل يوم وحش شوفتيه، داليا بصتله بعناد، العناد اللي اتعلمته من الدنيا، قالتله لا يا مؤمن، انا مش عايزة حد يعوضني، انا عوضت نفسي بنفسي، انا مش البت الصغيرة اللي كنت بتضحك مع لؤي في الدرس، انا دلوقتي ست مطلقة ومعاها عيل ومسؤولية، وانا اللي بقيت عنيدة ومش عايزة ارجع، مش انت. مؤمن مصدقش، حاول يقابلها كذا مرة بعدها، راح لها الشركة، بعت لها ورد مع شذى، كلم سناء في السعودية عشان تكلمها، سناء كلمتها وقالت لها يا بت ده الراجل لسه شاريكي وبيموت فيكي، اديله فرصة، داليا قالت لسناء انا خايفة يا سناء، خايفة يرجع يسيبني تاني عند أول مشكلة، خايفة كبرياءه يرجع يوجعني تاني، انا مبقتش حمل وجع تاني، انا عندي آدم دلوقتي. وشذى كمان حاولت معاها وقالت لها يا داليا مؤمن اتغير، ده بقى راجل بجد وبيحبك، بس داليا كانت بتعيط وتقول انا لسه بحبه يا شذى، انا عمري ما بطلت أحبه، بس كرامتي وجعاني أوي، انا عايزاه يحس باللي انا حسيته عشر سنين. وفي يوم، آدم تعب أوي بالليل وجاله تشنج من الحرارة، داليا اتخضت ومكنتش عارفة تعمل ايه، الساعة كانت اتنين بالليل، كلمت سناء اللي مسافرة، كلمت شذى تليفونها مقفول، ملقتش قدامها غير مؤمن، كلمته وهي بتعيط وقالتله الحقني يا مؤمن آدم بيموت، مؤمن في عشر دقايق كان عندها بعربيته، خد الولد وجري بيه على المستشفى، وفضل طول الليل معاها في المستشفى شايل الولد وبيجري بيه من اوضة لأوضة لحد ما الحرارة نزلت والولد بقى كويس. الصبح بدري وهم قاعدين في اوضة المستشفى وآدم نايم على سريره، داليا بصت لمؤمن، لقيته نايم على الكرسي وهدومه متبهدلة وشكله تعبان من الجري طول الليل، ساعتها بس قلبها حن، عرفت انه لسه هو هو مؤمن بتاع زمان، الراجل الجدع اللي هيحبها ويشيلها، قربت منه وصحته بالراحة، قالتله مؤمن قوم روح، قالها لا انا قاعد معاكم، قالتله انا آسفة، انا كنت عنيدة أوي، كنت فاكرة العند هيحميني، بس طلع بيبعدني عن أكتر حد بيحبني. مؤمن مسك ايدها وقالها ولا يهمك، عشر سنين فراق كتير أوي، بس كفاية اننا رجعنا، انا مش هسيبك تاني أبدا حتى لو انتي اللي عايزة تسيبيني، داليا ضحكت لأول مرة من قلبها من سنين، ضحكة زي ضحكتها بتاعة ثانوي، وقالتله طب ايه هتفضل ماسك ايدي كده كتير، الناس هتقول ايه، قالها يقولوا اللي يقولوه، دي ايد مراتي المستقبلية، آدم صحي في اللحظة دي وقال ماما، مؤمن شاله وباسه وقال صباح الخير يا بطل، داليا بصت لهم الاتنين وحست لأول مرة من عشر سنين انها رجعت بيتها، ان الفراق الطويل ده كان لازم يحصل عشان يعرفوا قيمة بعض بجد. الحكاية بقى ابتدت تاخد شكل تاني خالص بعد ليلة المستشفى دي، مؤمن مبقاش بيضيع وقت، كان كل يوم يعدي على داليا في بيت أهلها يطمن على آدم ويجيب معاه لعب وشيكولاتة، مامتها اللي كانت في الاول مقلقة منه رجعت حبته من تاني لما شافت حنيته على الواد، آدم نفسه اتعلق بيه بسرعة غريبة، بقى يقوله يا عمو مؤمن وبعدها بشوية بقى يقوله يا بابا مؤمن من غير ما حد يقوله، وداليا كانت بتسمع الكلمة دي وقلبها بيدق جامد. مؤمن عرض عليها الجواز بشكل رسمي، راح جاب مامته وجالها البيت، مامتها عيطت من الفرحة، بس داليا طلبت منه فترة تفكير، قالتله بص يا مؤمن انا مش عايزة أظلمك معايا، انا ست مطلقة والمجتمع مش بيرحم، وكلام الناس كتير، وانت راجل لسه على البر ومتجوزتش قبل كده وتستاهل واحدة أحسن مني، مؤمن اتنرفز ساعتها وقالها أحسن منك فين، انتي اللي كنتي حلم عمري، انتي اللي انا ضيعتها بكبريائي مرة ومش هضيعها تاني، كلام الناس ده آخر حاجة أفكر فيها، انا عايزك انتي وآدم وبس. سناء نزلت مخصوص من السعودية لما عرفت انهم رجعوا لبعض، عملت لهم عزومة كبيرة عندها في البيت وعزمت شذى ولؤي كمان، لؤي اللي كان سبب الخناقة بتاعة زمان، لؤي أول ما شاف مؤمن ضحك وقال ياااه يا مؤمن لسه فاكر خناقة الدرس، والله يا ابني داليا كانت بتحبك وانت كنت مجنون، انا كنت بهزر معاها عادي وانت قلبتها دراما، مؤمن ضحك وقال كنت عيل أهبل، بس الحمد لله ربنا رجعهالي. شذى كانت قاعدة جنب داليا وماسكة ايدها وبتقولها شوفتي يا داليا ربنا لما بيريد حاجة بتحصل مهما طال الزمن، عشر سنين مش قليل بس الحب الحقيقي مابيموتش، داليا كانت بتبص لمؤمن وهو بيلعب مع آدم على الأرض وبتحس انها طايرة من الفرحة، بس لسه جواها حتة خوف صغيرة، خوف ان كل ده يطلع حلم وتصحى منه. يوم كتب الكتاب، داليا كانت لابسة فستان أبيض بسيط وشعرها نازل على كتفها وآدم لابس بدلة صغيرة ومسك البوكيه بدالها، مؤمن أول ما شافها مقدرش يمسك دموعه، دموع راجل بقاله عشر سنين مستني اللحظة دي، قرب منها وقالها فاكرة لما قولتلك انتي رخيصة، انا دلوقتي بقول قدام كل الناس انتي أغلى واحدة في حياتي، انتي اللي علمتيني يعني ايه حب ويعني ايه ندم ويعني ايه كبرياء ممكن يضيع كل حاجة، داليا عيطت وحضنت آدم وقالتله احنا من النهاردة بقينا عيلة، عيلة بجد. بعد الجواز سافروا اسكندرية يقضوا كام يوم هناك، آدم أول مرة يشوف البحر وكان بيجري على الرملة ومؤمن بيجري وراه وداليا قاعدة بتتفرج عليهم وبتضحك، حست ان ربنا عوضها عن كل اللي شافته، فهمت ان الفراق اللي حصل مكانش عقاب، كان درس، درس ليها عشان تبقى قوية وتعتمد على نفسها، ودرس ليه عشان يعرف ان الحب مش تملك وكبرياء، الحب ثقة وأمان، وان اللي بيحب بجد عمره ما بيسيب حتى لو فاتت عشر سنين. ورجعوا من السفر وابتدوا حياتهم الجديدة في شقة مؤمن اللي كان مجهزها من زمان وكأنه كان حاسس انها هترجع، داليا علقت صورتهم الجديدة في الصالة جنب صورة قديمة ليهم من أيام ثانوي كان مؤمن محتفظ بيها، كل يوم الصبح مؤمن كان بيصحى يبوس راس آدم قبل ما ينزل شغله ويقول لداليا خلي بالك من نفسك يا ست البنات، وداليا بقت تضحك من تاني، الضحكة اللي كانت راحت منها سنين، بقت تطبخ وهي بتغني وآدم بيساعدها، ومؤمن لما يرجع من الشغل يحكي لها عن يومه وهي تحكي له، مبقاش فيه كبرياء بينهم، بقى فيه حب كبير اتولد من وجع كبير، وعرفوا ان عشر سنين فراق كانت كفيلة تعلمهم ان اللي بيحب بجد لازم يسامح ولازم يتمسك باللي بيحبه مهما حصل. وفي كل مرة كانت داليا تقلق وتفتكر الماضي، كان مؤمن يطمنها ويقولها احنا ولاد النهاردة يا داليا، اللي فات مات، احنا قدامنا عمر بحاله نعوضه، آدم محتاجنا احنا الاتنين، وانا محتاجك انتي اكتر ما انتي محتاجاني، فكانت داليا تطمن وتترمي في حضنه وتحس بالأمان اللي كانت بتدور عليه طول عمرها. ومن يومها بقوا يحتفلوا كل سنة بنفس اليوم اللي اتقابلوا فيه صدفة في المول، ويقولوا لبعض الحمد لله ان الفراق كان عشر سنين بس مش اكتر. والحب الحقيقي عمره ما بيضيع مهما طال الزمن والبعد بيقوي القلوب ويرجعها لبعض تاني بحبك يا داليا للأبد

مقالات ذات صلة

المترجم بتاعك

فارس وامل ملك إبراهيم 8

كافتيريا المدرسة

علا السعدني

زهرة الهاشمي سامية رشاد

غرام قلبي

اترك تعليقاً إلغاء الرد