سما
مراد بقى يعمل حاجات غريبة عمره ما عملها، بقى يجيب فطار للشركة كلها، بقى يساعد عمال البوفية، بقى يسمع شكاوي الموظفين، مازن قاله انت ايه اللي جرالك، مراد قاله سما خلتني أشوف إني كنت ظالم، كنت فاكر إن الشدة هي اللي بتمشي الشغل، طلعت الحنية هي اللي بتمشيه، مروان قاله يا باشا ده انت بقيت ملاك، وسما كانت واقفة سامعة الكلام ده من ورا الباب وقلبها دق جامد أوي، جريت على مكتبها عشان محدش يشوفها وهي مكسوفة.
وفي يوم حنين كلمت سما وقالتلها أنا شفت مراد في مول بيشتري هدوم أطفال، سما استغربت وقالت أكيد لحد قريبه، تاني يوم مراد دخل عليها المكتب ومعاه شنط كتير فيها هدوم ولعب لأخوها الصغير، قالها عرفت إن أخوكي نفسه في عجلة، سما عنيها دمعت وقالتله انت بتعمل كده ليه، قالها عشان انتي بتفكريني بأختي الصغيرة اللي ماتت، أنا مليش حد غيركم دلوقتي، سما مقدرتش تمسك دموعها، ولأول مرة حست إن مراد مش مجرد مدير متسلط، ده بني آدم جواه طيب بس الدنيا قست عليه.
سلمي حاولت آخر محاولة، راحت لمراد وقالتله سما بتقابل مازن من وراك وبتحب مازن، مراد اتعصب جدا وراح لمازن، مازن ضحك وقاله يا مجنون دي زي أختي، أنا بحب حنين صاحبتها، مراد اتصدم وقال بجد، مازن قاله أيوه وكنت عاوزك تساعدني أكلمها، مراد حضن مازن وقاله يا غبي كنت هتخليني أخسرها، وراح جري على مكتب سما وقالها أنا آسف إني شكيت فيكي، سما قالتله انت لسه متسلط ومش هتتغير، قالها والله هتغير عشانك.
في يوم عيد ميلاد الشركة، مراد كان عامل حفلة كبيرة، وكل الموظفين كانوا موجودين، مراد طلع على المسرح وقال كلمتين شكر، وبعدين قال في موظفة هنا غيرت حياتي، علمتني إن الكبرياء مش كل حاجة وإن الكلمة الحلوة بتكسب، وإن المدير الناجح مش اللي بيخوف الناس اللي بيحبب الناس فيه، سما كانت واقفة بعيد وحاسة إن الكلام عليها، قلبها بيدق جامد، مراد نزل من على المسرح وراح ناحيتها ومسك ايديها قدام كل الناس، قالها يا سما أنا بحبك، أنا عارف إني كنت رخم وغلس ومتسلط، بس انتي خلتيني أحب أكون بني آدم كويس، تتجوزيني، كل الناس سقفت وسلمي وقعت من طولها من الصدمة ومازن ومروان كانوا بيزغرطوا.
سما بصت له وعينيها مليانة دموع، افتكرت كل الإهانات وكل السهر وكل مرة زعق لها، وافتكرت كمان كل مرة وقف جنبها وكل مرة ضحك بسببها، بس كبرياءها وجعها، قالتله بصوت عالي عشان الكل يسمع، لا يا مستر مراد، أنا مقبلش أكون واحدة من اللي حبوك وطردتهم، أنا مش زيهم، أنا جيت هنا عشان اشتغل بكرامتي، وانت قلت أي موظفة تحبك هتطردها، وأنا قررت إني أطرد نفسي قبل ما انت تطردني، أنا مستقيلة، وشالت البادج بتاعها وحطته على الأرض ومشيت.
