رواية غصب عنك بقلم نيمو محمد 3
نسخ
الفصل الثالث
العروسة اللي وقفت قدام الديب
الساعة كانت لسه سبعة الصبح لما صوت فرامل عربية سودا دوّى قدام بيت السيوفي
نرمين كانت واقفة في البلكونة من بدري ومغمضة عينيها من قلة النوم بعد اللي حصل امبارح
أول ما شافت رجالة فارس نازلين من العربيات قبضت إيديها بعصبية وقالت لنفسها
والله يا فارس الجبالي لأخليك تندم على اليوم اللي فكرت فيه إنك تقدر تكسر نرمين السيوفي
خبط الباب
أمها كانت متوفية من سنين وأبوها تعبان ومفيش في البيت غيرهم فاضطرت تنزل تفتح بنفسها
كان واقف قدامها راجل كبير في السن لابس جلابية رمادي وقال باحترام
صباح الخير يا بنتي أنا عم رجب سواق فارس بيه
نرمين ردت ببرود
صباح النور اتفضل قول لسيدك إن العروسة مش هتيجي
عم رجب اتوتر وقال
بس يا بنتي فارس بيه مستنيكي في الدار الكبيرة
ضحكت بسخرية
خليه يستنى لحد بكرة وبعده هو مش مستني حاجة غير إنه يتعلم الأدب
وقبل ما تقفل الباب سمعت صوت عربية تانية وقفت
والصوت اللي جه بعدها خلّى قلبها يدق غصب عنها
افتحوا الباب
فارس بنفسه كان واقف قدام البيت
لابس جلابية بيضا وعليها صديري أسود وعصاية في إيده وعينيه فيها نظرة ما تعرفش هي غضب ولا حاجة تانية
نرمين بصت له من فوق لتحت وقالت
إيه يا فارس بيه؟ هو إنت فاضي لدرجة إنك بتلف على العرايس من الصبح؟
رد بمنتهى البرود
لما العروسة تبقى إنتي أبقى أفضى لها طول اليوم
اتكسفت من نفسها إنها حسّت قلبها دق أسرع لكنها تماسكت وقالت
الكلام الحلو ده روح قوله لواحدة تانية يمكن تصدقك
فارس قرب منها خطوة
أنا مش بتاع كلام حلو يا نرمين وأنا لو عايز واحدة تصدقني مش هتعب نفسي في الكلام
رفعت حاجبها وقالت
أمال هتعمل إيه؟ هتطلع مس\دسك وتخوفني؟
بص لها بجدية وقال
أنا عمري ما خوفت ست ولا هعملها معاكي
الجملة فاجأتها للحظة لكنها افتكرت كل اللي حصل ورجعت لقسوتها
طب اتفضل بقى من غير مطرود
فارس ابتسم وقال
أنا جاي آخدك تزوري أمي
نرمين استغربت
أمك؟
فارس سكت ثانية وبعدين قال
أمي عايشة يا نرمين بس من يوم موت أبويا وهي مش بتخرج من أوضتها غير قليل وطلبت تشوفك
نرمين عقدت حواجبها
هي تعرفني منين؟
فارس بص لها نظرة طويلة وقال
اسألي أبوكي
وفي اللحظة دي خرج عبد الرحمن من الأوضة وهو متسند على الحيطة
أول ما شاف فارس قال بحدة رغم تعبه
