ميار

ميار كانت طول عمرها البنت اللي مبتعرفش توطي راسها لحد مهما حصل والكل في الحتة كان عارف ان كرامتها فوق اي حاجة في الدنيا حتى لو هتتوجع من جواها هي كانت بتضحك وتقول انا جامدة ومحدش يقدر يكسرني وكانت صاحبتها اماني دايما تقولها يا ميار الكبرياء ده هيوديكي في داهية في يوم من الايام بس ميار مكنتش بتسمع كلام حد وكانت ماشية بدماغها وبس وفي نفس الشارع كان فيه فهد الشاب اللي كل البنات بتحبه بس هو مكنش شايف غير شغله وحياته وكان عناده اوحش من عناد ميار بمراحل واصحابه ماجد ومصطفي كانوا دايما يهزروا معاه ويقولوله يا فهد انت هتفضل كده لحد امتى هتفضل شايف نفسك ومش عاوز تعترف انك بتحب حد وفهد كان يضحك ويقولهم حب ايه يا عم انت وهو انا معنديش وقت للكلام الفاضي ده بس الحقيقة ان قلبه كان بيدق لما بيشوف ميار من بعيد من غير ما حد ياخد باله

اول مرة اتقابلوا بجد كانت في فرح فداء بنت خالة ميار وميار كانت لابسة فستان اسود بسيط وشعرها سايب وكانت زي القمر وفهد كان معزوم من ناحية العريس اللي هو صاحبه ماجد وفجأة عينهم جت في عين بعض والدنيا كلها سكتت حواليهم لمدة ثانية بس ميار بسرعة لفت وشها وعملت نفسها مش شايفاه وفهد برضه عمل نفسه مش مهتم وراح سلم على ماجد وقعد يضحك بصوت عالي عشان يبين انه مش فارق معاه بس طول الفرح كان كل واحد فيهم بيراقب التاني من بعيد واماني لاحظت وقالت لميار مالك يا بت بتبصي على مين قالت لها مببصش على حد انا قرفانة من الزحمة بس وعلى الترابيزة التانية مصطفي بيقول لفهد يا ابني روح كلمها البت بتبصلك من بدري قال له اخرس يا مصطفي انت هتوديني في داهية انا مبجريش ورا حد

بعد الفرح بكم يوم ميار كانت نازلة تشتري حاجات من السوق وفجأة لقت فهد واقف عند محل العصير اللي هي بتحبه واول ما شافها ابتسم غصب عنه وقال لها ازيك يا ميار قالت له الحمد لله كويسة وانت عامل ايه قال لها زي ما انتي شايفة واقف بشرب عصير قالت له طب عن اذنك عشان مستعجلة قال لها استني هو انتي على طول مستعجلة كده ليه هو انا بعبع قالت له لا مش بعبع ولا حاجة بس انا مبحبش اقف في الشارع كتير قال لها على فكرة انتي مغرورة اوي على الفاضي قالت له وانا مغرورة ليه شايفني ماشية بتتنك على الناس قال لها لا بس طريقتك بتقول كده قالت له والله دي طريقتي واللي مش عاجبه ميتعاملش معايا وسابته ومشيت وهو واقف مصدوم ومش مصدق انها كلمته كده بس من جواه كان مبسوط انها اتكلمت معاه حتى لو بتتخانق