رواية غصب عنك بقلم نيمو محمد 2
وأنا حر أناديكي باللي يعجبني
رفعت إيدها عشان تقفل الباب في وشه لكنه حط كفه على الباب ومنعها
بصي يا بنت الناس أنا جاي أتكلم مع أبوكي في كلمتين ومش ناقصني وجع دماغ
قالت بتحدي
وأنا مش ناقصني أشوف وشك
ابتسم ابتسامة صغيرة وقال
هتشوفيه كتير يا قلبي فوفري على نفسك
نرمين اتجمدت من الكلمة وبعدين زعقت
قلبي مين يا قليل الأدب؟!
سمع صوت أبوها من جوه
سيبيه يدخل يا نرمين
بصت لأبوها بصدمة
بابا إنت بتقول إيه؟
سيبيه يا بنتي
فتحت له الطريق بالعافية ودخل فارس بخطوات ثابتة كأنه صاحب المكان
أول ما شاف عبد الرحمن واقف بالعافية حاول يقوم من مكانه
فارس رفع إيده وقال
خليك مكانك يا عبد الرحمن مش جاي أزود تعبك
عبد الرحمن رد بمرارة
تعبنا كله منك يا فارس بيه
فارس سكت لحظة وبعدين حط ظرف كبير على الترابيزة
دي ورقة تسديد ديونك ودي عقود الأرض اللي عليها الخلاف وكل حاجة تخصك هترجعلك
عبد الرحمن بص للظرف وممدش إيده
مقابل إيه؟
فارس بص لنرمين اللي كانت واقفة بعيد بتراقب كل حركة منه
الجواز
نرمين ضحكت ضحكة قصيرة مليانة قهر
هو إنت مبتفهمش؟ قولنالك لأ
فارس لف لها ببطء
وأنا سمعتك
أمال جاي ليه؟
عشان أقولك إن بكرة كتب كتابنا
نرمين قربت منه والغضب في عينيها
والله لو تجيب مأذون البلد كلها مش هتجوزك
فارس نزل عينيه عليها وقال
أنا عمري ما خدت حاجة غصب عني
ردت بسرعة
أمال جاي تعمل إيه؟
هخليكي تختاريني بإرادتك
نرمين ضحكت بسخرية
إنت محتاج دكتور يا فارس بيه مش عروسة
لأول مرة واحد من رجالة فارس كتم ضحكته بالعافية
فارس بص له بطرف عينه فالراجل رجع وقف زي التمثال
وبعدين رجع بص لنرمين وقال
لسانك طويل أوي يا بنت السيوفي
وأنت غرورك أطول من النيل كله
قرب منها لحد ما بقت واقفة قدامه مباشرة وقال بصوت واطي
خلي بالك من لسانك معايا يا نرمين
رفعت عينيها في عينيه وقالت
وإنت خلي بالك من قلبك يا فارس لأنك لو قربت مني يوم هتعرف يعني إيه تندم
سكت فارس للحظات طويلة
كان باصص لها بطريقة غريبة كأنها فكّرته بحد كان يعرفه من زمان
وبعدين فجأة قال
يا عبد الرحمن أنا هسيبك ترتاح الليلة دي لكن بكرة عايز إجابة واضحة
عبد الرحمن رد بصوت مبحوح
إجابتي لأ يا فارس
فارس أخد نفس طويل وحط إيده في جيبه وقال
يبقى هضطر أقولك الحقيقة اللي بنتك لسه متعرفهاش
نرمين بصت لأبوها فلقته اتغير لونه وبدأ يترعش
