منار ومحمود
الجيران كلهم كانوا بيتفرجوا على خناقات البلكونة. محمود يطلع البلكونة يشرب قهوة، منار تطلع قصاده تشغل اغنية وتقعد تغني بصوت نشاز عشان تغيظه. يقول لها ممكن توطي الزفت ده؟ تقول له لا مش ممكن، دي شقتي وانا حرة. يقول لها على فكرة الذوق العام ده مادة ساقطة فيها. تقول له والغرور مادة انت واخد فيها دكتوراه. ومرة كانت بتغسل البلكونة وغرقت البلكونة بتاعته مية، طلع يزعق لها وهي تقول له معلش يا باشا اصل المية بتحبك فجتلك.
مرة محمود كان عنده مامورية وكان راجع تعبان ومش طايق نفسه، لقى منار عاملة عيد ميلاد لصاحبتها في البلكونة ومشغلة دي جي وجايبة بنات الدروس كلهم وعاملين هيصة. طلع البلكونة وقال لها يا منار كفاية بقى انا جاي تعبان وعاوز انام. منار بصتله وقالت له طب ما تنام هو حد ماسكك؟ انت فاكر نفسك في القسم؟ هنا بلكونة مش مكتب. محمود اتعصب ودخل جاب الموبايل واتصل باسامه صاحبه اللي ساكن معاه اوقات، قال له تعال خدني من هنا قبل ما ارتكب جناية في البت اللي قصادي دي. اسامه جه وقعد يضحك وقال له يا ابني دي عيلة صغيرة انت مكبر الموضوع ليه؟ محمود قال له عيلة ايه دي شيطانة لابسة يونيفورم مدرسة.
اسامه كان عكس محمود تماما، شاب روش وبيحب الهزار، وكان كل ما يشوف منار يقول لها ازيك يا دوشة العمارة. وهي كانت بتحبه عشان بيهزر معاها وبيجيب لها شيبسي وشوكولاتة. مرة قال لها على فكرة محمود بيحبك بس مش عارف يقولها ازاي. منار ضحكت وقالت له يحبني؟ ده بيكرهني اكتر ما بيكره المجرمين اللي بيقبض عليهم. اسامه قال لها لا والله ده كل شوية يتكلم عنك، حتى وهو في الشغل يقول البت المجنونة اللي قصادي هتسقط بسببي.
في نفس الوقت منار كانت مخطوبة لابن خالتها جمال، خطوبة صالونات كده اهلها غاصبينها عليها عشان جمال شاب كويس وبيشتغل في الخليج وبيقبض كويس. هي مكنتش بتحبه بس كانت ساكتة عشان ترضي اهلها وعشان ميادة كانت بتقول لها يا بنتي ده مستقبله مضمون. وجمال كان كل شوية يبعت لها رسايل رخمة ويتحكم فيها متلبسيش ده متعمليش ده متكلميش ده ومتحطيش اغاني بصوت عالي عشان الجيران يقولوا علينا ايه. وهي كانت مخنوقة منه جدا بس مش عارفة تفسخ الخطوبة عشان خايفة من كلام الناس. وكانت كل ما تتخانق معاه تطلع البلكونة تعلي الاغاني اكتر كأنها بتنتقم.
