رواية حبيبتي مجرمه بقلم نيمو محمد 3

نرمين بصت له بحزن

الله يرحمه

آدم سكت للحظة وبعدين قال

كان أكتر واحد فاهمني في الدنيا

نرمين لأول مرة ما لقتش رد هزار تقوله فقربت منه وقالت بهدوء

أكيد كان فخور بيك

آدم بص لها واتأثر بكلامها لكنه خبى ده بسرعة

ادخلي ارتاحي وأنا هجهزلك أوضة

نرمين بصت للكنبة وقالت

أنا هنام هنا

آدم استغرب

ليه

عشان لو فيه عفريت في الأوضة هتكون أول واحدة تشوفه

آدم ضحك وهز راسه

إنتي مستحيل تتغيري

نرمين ابتسمت وقالت

ولو اتغيرت هتحبني برضه

آدم سكت وبصلها فترة أطول من اللازم

نرمين نفسها اتلخبطت وقالت بسرعة

بهزر يا عم الظباط

لكن الحقيقة إن آدم بدأ يحس بحاجة عمره ما حسها قبل كده كل ما يبص في عينيها ينسى القضية للحظات وكل ما يسمع صوتها يحس إن الدنيا أخف

وفجأة سمعوا صوت خبط شديد على الباب

آدم أشار لنرمين تسكت وطلع سلاحه وقرب من الباب بحذر

صوت راجل من بره قال

شرطة افتح الباب فورًا

نرمين بصت لآدم برعب وهمست

يا نهار أبيض هما وصلوا لنا

آدم همس لها

ادخلي الأوضة بسرعة

لكن قبل ما تتحرك سمعوا صوت راجل تاني بيقول

افتح يا آدم إحنا عارفين إنك جوه

آدم عرف الصوت فورًا

كان اللواء سامح بنفسه

نرمين بصت له وقالت

هنعمل إيه دلوقتي

آدم مسك إيدها وقال بصوت واطي

هتثقي فيا

نرمين بصت في عينيه وقالت

رغم إنك رخم بس آه

آدم فتح باب صغير خلفي كان بيؤدي لسلم قديم وقال لها

اجري وأنا وراكي

خرجوا من الباب الخلفي ونزلوا السلم بسرعة لكن في آخره لقوا اتنين من رجال اللواء مستنيينهم

واحد منهم مسك إيد نرمين وقال

خلصت اللعبة يا حلوة

آدم ضرب إيده بعيد عنها ووقف قدام نرمين

محدش هيلمسها

الراجل ضحك

إنت فاكر نفسك لسه ظابط يا آدم أنت مطلوب للعدالة

آدم رد بثبات

والعدالة هتعرف إنكم مجرمين

وفجأة نرمين لمحت صندوق أدوات جنب الحيطة فمدت إيدها وخدت مطفأة حريق ورشتها في وش الراجلين

صرخت وهي بتجري

اجري يا آدم دي لحظة تاريخية أنا أنقذتك من غير ما أسرق حاجة

آدم جري وراها وهو بيكح

يا بنت المجنونة إنتي رشيتيني أنا كمان

نرمين ردت وهي بتجري

المهم إننا لسه عايشين يا حبيبي

آدم سمع كلمة يا حبيبي لكنه ما لحقش يرد لأنهم خرجوا للشارع وركبوا عربية مراد اللي كان مستنيهم

مراد بص لهم وقال

إيه اللي حصل لكم إنتوا الاتنين شكلكم طالعين من حرب عالمية

نرمين قعدت في الكرسي الخلفي وهي بتتنفس بسرعة