رواية حبيبتي مجرمه بقلم نيمو محمد 2
رواية حبيبتي مجرمة تحت التحقيق 😂❤️🔥
بقلم نيمو محمد
الجزء الثاني
آدم كان واقف في نص أوضة التحقيق ماسك الورقة وبيقرأها للمرة العاشرة ونرمين قاعدة قدامه بتاكل سندوتش جبنة وبتبص له من تحت لتحت
آدم رفع عينه فجأة وقال بعصبية
إنتي لسه بتاكلي
نرمين بصت للسندوتش وقالت باستغراب
أمال أعمل إيه يعني أعيط عليه هو كمان
آدم حط الورقة على المكتب وقال
يا بنتي إنتي مش حاسة إن فيه حد بيهددني وبيحاول يقتلك
نرمين بلعت الأكل وقالت
حاسه طبعًا بس أنا لو فضلت من غير أكل هموت من الجوع قبل ما حد يقتلني
آدم قرب منها وحط إيده على المكتب
اسمعيني كويس يا نرمين من اللحظة دي إنتي مش متهمة وبس إنتي كمان شاهدة في قضية كبيرة وأنا لازم أعرف مين اللي ورطك
نرمين ابتسمت وقالت
يعني هتطلعني من هنا
آدم رد بجدية
لأ
ابتسامتها اختفت
أمال بتقول إيه يا أخويا
هتفضلي تحت المراقبة لحد ما نعرف الحقيقة
نرمين رمت السندوتش على الطبق وقالت
طب والله العظيم ما أنا متكلمة غير لما تجيبلي محامي
آدم ضحك بسخرية
محامي إيه يا ست إنتي هتعملي فيها بريئة
نرمين وقفت ورفعت صباعها في وشه
أنا بريئة فعلًا يا سيادة الظابط واللي مش عاجبه يشرب من البحر
آدم مسك صباعها ونزله بهدوء وقال
وطّي صوتك
نرمين بصت لإيده اللي ماسكة إيدها وسكتت لحظة
هو إنت بتمسك إيدي ليه
آدم سابها بسرعة
عشان ما ترفعيش صباعك في وشي تاني
نرمين ابتسمت بخبث
آه يعني مكسوف تقول إن إيدي عجبتك
آدم فتح بقه من الصدمة
إنتي مجنونة رسمي
نرمين رجعت قعدت وقالت
دي شهادة أعتز بيها من سيادتك
قبل ما آدم يرد الباب اتفتح ودخل الرائد مراد صاحبه وزميله في الشغل
مراد بص لنرمين وبعدين لآدم وقال
هو إحنا فتحنا حضانة في القسم ولا إيه
نرمين ردت بسرعة
لأ يا حبيبي دي حفلة استقبال للمتهمين بس الظاهر إنك داخل من غير دعوة
مراد انفجر من الضحك وآدم بص له بغيظ
إنت جاي تشتغل ولا تتفرج على المسرحية
مراد قرب منه وهمس
يا عم دي أول مرة أشوفك واقف قدام واحدة ومش عارف ترد عليها
آدم زقه بعيد وقال
اطلع بره يا مراد
مراد رفع إيده باستسلام
حاضر يا سيادة العاشق
آدم صرخ
مراد
مراد جري بره وهو بيضحك ونرمين فضلت تضحك لحد ما دموعها نزلت
آدم بص لها وقال
إنتي بتضحكي على إيه
نرمين مسحت دموعها وقالت
أصل صاحبك طيب أوي ومش عارف إنك لو اتجوزت هتخلي مراتك تقدم طلب نقل من البيت
